2026 ஆம் ஆண்டுக்கான முப்படைகளுக்கு உணவுப் பொருட்களைக் கொள்வனவு செய்யும் டெண்டரை வழங்கியதில் 180 மில்லியன் ரூபாய் ஊழல் நடந்துள்ளதாகக் கூறி, அது குறித்து விசாரணை நடத்துமாறு கோரி ‘இலஞ்சம், ஊழல் மற்றும் வீணடிப்புக்கு எதிரான சிவில் சக்தி’ அமைப்பினர் நேற்று (30ஆம் திகதி) இலஞ்ச அல்லது ஊழல் விசாரணை ஆணைக்குழுவில் முறைப்பாடு ஒன்றைச் சமர்ப்பித்தனர்.

உலர் உணவுகள் மற்றும் புதிய உணவுகள் (Dry & Fresh Rations) வழங்கலுக்காகக் கோரப்பட்ட இந்த டெண்டரில், மிகக்குறைந்த விலையை முன்வைத்துத் தகுதிகளைப் பூர்த்தி செய்த நிறுவனத்திற்கு டெண்டரை வழங்கவில்லை என அந்த அமைப்பின் தலைவர் ஜாமுனி காமந்த துஷார குற்றம் சாட்டியுள்ளார்.

பழைய ஒப்பந்தக்காரர்களின் தேவைகளுக்கேற்ப, நுணுக்கமான முறையில் மேன்முறையீட்டுச் சபை (Appeals Board) ஒன்றை அமைத்து, அதன் ஊடாக இந்த உணவு டெண்டரை மீண்டும் பழைய ஒப்பந்தக்காரர்கள் சிலருக்கே வழங்கியுள்ளதாகவும், இதன் மூலம் இந்த பாரிய ஊழல் மற்றும் மோசடி அரங்கேற்றப்பட்டுள்ளதாகவும் அவர் தனது புகாரில் மேலும் குறிப்பிட்டுள்ளார்.